БНСУ-ын Ерөнхийлөгч Юн Сүк Ёл өчигдөр шөнө дэлхийг донсолголоо. Тэрбээр сөрөг хүчнээ ардчилсан, умард Солонгостой холбоотой хэмээн зарлаж онц байдал зарласан юм. Харин БНСУ-ын Үндэсний асамблей яаралтай хуралдаж, хуралдаанд оролцсон 190 гишүүн бүгд эсэргүүцсэнээр онц байдал цуцлагдав. Солонгосчууд ерөнхийлөгчийнхөө энэ гэнэтийн үйлдлийг тэргүүн хатагтай холбон шүүмжилж байна. 51 настай ч 30 настай мэт харагддаг энэ хатагтайн талаар цуу яриа их. Нөхрийнхөө ажилд хутгалддаг, хэт нөлөөлдөг гэдгээс гадна авлига авсан гэгдэж байлаа. Өнгөрсөн зун 2250 долларын үнэтэй Dior брэндийн үнэтэй цүнх бэлгэнд авсан, хувьцааны хууль бус арилжаанд оролцсон гэж прокурорын байгууллага мэдээлж байв. 

 Солонгосын тэргүүн хатагтай Ким Кеон Хэ урлагийн чиглэлээр мэргэшсэн. Ерөнхийлөгч Юн Сүк Ёл, Ким Кеон Хэ нар 2012 онд гэрлэсэн. БНСУ-ын Ерөнхийлөгч 63 настай бол Тэргүүн хатагтай 51 настай. 

 Тэрбээр Сөүлийн их сургууль зэрэг хэд хэдэн их сургууль төгссөн, боловсролтой бүсгүй. Ким Кеон Хэ нөхөр нь БНСУ-ын Ерөнхийлөгчийн сонгуульд нэр дэвшиж байхад карьерынхаа талаар худал мэдүүлсэн гэх дуулианд холбогдож, олон нийтийн өмнө толгой бөхийн уучлалт гуйсан билээ. Бүсгүй “Би сайхан харагдахын тулд карьерынхаа талаар худлаа бичсэндээ уучлалт гуйж байна. Ийм зүйл хийх ёсгүй байсан юм. Эргээд бодоход энэ бол гутамшиг байсан” хэмээж, уг дуулианаас нь болж хүнд замыг туулан, өдий зэрэгт хүрсэн нөхрийг нь дэмжихээ болихгүй байхыг солонгосчуудаас хичээнгүйлэн хүссэн юм. 

Танилцаад 10 жил гаруй болж буй тэдний дунд ямар ч хайр дурлал байдаггүй, байгаа ч үгүй, эхнэр нөхөр биш зүгээр л хамтрагчид гэх яриа ч бий. Гэхдээ тэд олны өмнө хамт гарч ирэх болгондоо аз жаргалтай харагддаг. БНСУ-ын Тэргүүн хатагтай залуу харагддаг нууцаа хуваалцахдаа “Миний гоо сайхны нууц Солонгост үйлдвэрлэдэг маск, гоо сайхны бүтээгдэхүүнүүдийн ач тус биш. Харин байнга оюун ухаанаа сайжруулж байдагт оршдог” гэсэн байна. Түүний ярьж буйгаар тархи залуу байх тусам үрчлээ бага байдаг аж.

Солонгос эмэгтэйчүүдийн сайн гэрийн эзэгтэй, эхнэр байх нийтлэг жишгийг эвдэж, карьертаа анхаарал хандуулж ирсэн Ким Кеон Хэ урлагийн боловсролоор магистр зэрэгтэй бол дижитал контент дизайны чиглэлээр докторын зэрэгтэй. Кеон Хэ, Сүк Ёл нар хүүхэдгүй. Дөрвөн нохой, гурван мууртайгаа амьдардаг. БНСУ-ын Тэргүүн хатагтай 2009 онд “Кована Контент” урлагийн үзэсгэлэнгийн чиглэлээр мэргэшсэн компанийг байгуулж, захирлаар нь ажиллаж эхэлсэн. Ерөнхийлөгч нөхөртэй ч карьераа орхихгүй байхыг илүүд үздэг Кеон Хэ нөхрөө Ерөнхийлөгч болсны дараа эзэгтэйн үүргээ биелүүлж, түүнийг дэмжиж, ар тал нь болно гэдгээ хэлж байсан билээ.