Энэ юу болж байна вэ? Усны тухай хуулийн 22.1-р зүйлд усны онцгой хамгаалалтын бүсийг тогтоосон байгаа. Голын татам болон эргээс 50 метрийн зай дотор голын онцгой хамгаалалтын бүс. Энэ хамгаалалтын бүсэд юу хийж болохгүйг хуульд маш тодорхой заасан байгааг дор зургаар харуулж байна. Цооног өрөмдөх байтугай, өрмийн хүнд даацын машин орохыг, барилгын ямар ч төрлийн ажил эрхлэхийг, тэр ч бүү хэл мал угаахыг хүртэл хориглосон байгаа.

Тэгвэл зураг дээр буй энэ хууль зөрчсөн үйлдэл яах вэ? Дайны үед нэгдсэн байдлаар фронт нээн довтолж буйн адилаар Сэлбэ гол руу маань өргөн фронтоор дайраад эхэлжээ. (хэн?) Одоогоор Арслантай гүүрний дээр доор 2 газар л лав дайралтанд өртсөн болтой. Өөр хаана ийм зүйл болж буйг зургийг нь явуулаарай.

Бодвол хөрсний шинжилгээ, геодезийн судалгаа хийж байна гэх байх. 1-рт тэр ч хориотой, ийм судалгааг урсацын тохиргоо хийх УИХ-ын шийдвэр гаргаж байж л хийнэ. (Журамд зөвхөн усны хяналт шинжилгээ хийх тухай заасан нь ч хууль зөрчиж байгаа) 2. Орчин үед хөрсний шинжилгээ, судалгааг ийм хоцрогдсон аргаар бус хамаагүй хямд, хамаагүй боловсронгуй технологиор шийдэх бүрэн боломжтой. 3.Энэ хүнд даацын машин механизм голын голдрол бүү хэл авто зам руу орох нь хориотой. Голд машинаа угаасан хүнийг бид хэрхэн яаж торгодог билээ. Гэтэл энэ хүнд даацын машин механизм голыг сүйтгэж байна. Голыг сүйтгээд зогсохгүй хэдхэн жилийн өмнө Сэлбэ голоо хамгаалахаар хийсэн далан хаалт, тохижилтын журмаар хийсэн замыг сүйтгэж устгаж байна. 4.Сэлбэ гол дээр ийм хөрсний шинжилгээ геодезийн судалгаа хийх ямар ч шаардлагагүй, учир нь энэ өрөмдөөд байгаа газруудын чинь эргэн тойронд байшин бариад хөрсний усыг "зайлуулаад" өчнөөн жил болж байна. Тэр ажлыг өнөөдөр өрөм тавьж буй энэ компаниуд л хийсэн. Усыг нь ховх сорж "зайлуулж" зай завсаргүй байшингууд барьчихаад одоо өнгөрсөн хойно нь хөрсний шинжилгээ хийнэ гэж байхын оронд сүүлийн 30 жил Сэлбэ голын эрэг дээр байшин барилга барьсан компаниуд, тэр ажилд нь оролцсон усны асуудлыг нь "шийдсэн" гэх компаниудаас хуульд заасан бүрдүүлэх ёстой цооногийн техникийн үзүүлэлтүүдийг авахад л хангалттай.

Энэ Сэлбэ гэдэг бяцхан ямар буруутай болоод, ямар гэм хийсэн болоод ингэж Монголчуудын, Улаанбаатарчуудын үзэл ядалтанд өртөж, яагаад хүчээр дайрч устгах гээд байгаа юм бэ? Энэ голын хөвөөн дээр хүү чинь охин чинь, эхнэр чинь, ах чинь, дүү чинь төрөөгүй юу? энэ голын хөвөөн дээр өвөг дээдэс чинь эцсийн амьсгаагаа татаагүй юу?

Энэ шидмэс шиг бяцхан гол ширгэчихвэл Улаанбаатар дуусна гэдгийг ойлгохгүй байна уу? Энэ гол ширгэчихвэл тэр их хөрөнгө, байшин сав, шилэн цамхаг орд харш, зам талбай чинь бүгд хэнд ч хэрэггүй хог новш болно, үр хүүхэд чинь амьдрах аргагүй болно гэж ойлгохгүй байна уу?

Сүүлийн сар орчим хугацаанд Сэлбэ голын урсац мэдэгдэхүйц багасаад байгаа, голын эх орчимд усны хэрэглээ өндөр болж байгаагаас болж байгаа байх, тэрэн дээр нь нэмээд ийм зүйлс хийгээд байвал Сэлбэ гол нэг л өглөө нүд анина. (магадгүй 9 сарын 1-нд) Тэр үед хэнийг буруутгах вэ? Энэ өрмийн машиныг уу? энэ өрөмдөж буй ажилчдыг уу? эсвэл муу амалсан намайг уу???

Сэлбэ гол ширгэх ёсгүй, Монголын хууль хэрэгжих ёстой.