Аймаг, сумдад угтах хаалга гэж нэг “юм” бий. Энэ хаалгыг сумд 30-100 гаруй саяар, аймгууд 200-650 сая орчим төгрөгөөр хийдэг. Оюутолгой, Тавантолгой орд байдаг Өмнөговь аймаг аргагүй л байгалийн баялагтай гэсэн шиг угтах үдэх хаалгаа хамгийн өндөр үнээр буюу 650 саяар хийсэн. Зарим эх сурвалж 700 сая төгрөгөөр “боссон” гэдэг. Гэтэл 650 сая төгрөгөөр бүтээсэн хаалга нь гурван тэмээтэй, гурван хатны зурагтай, ерийн нэгэн хаалга. Ядаж байхад гурван хатан нь нүүр нүдгүй, бөгтийсэн царай муутай эд байна гэж шүүмжлүүлж эхэллээ.    Хувь хүн 700 сая төгрөгөөр “тасарчихсан” хаус барьж болдог, харин нэг аймгийн 700 саяар барьсан хаалга нь энэ үнэ хаана нь шингэвээ гэмээр “нүнжиггүй” харагдаж байгаа нь нууц биш. Өмнөговийн угтах үдэх хаалгыг “Даян байгаль” ХХК хийж гүйцэтгэжээ.

“Даян байгаль”  ХХК гэхээр нийслэлчүүдэд танил санагдаж магадгүй. Өнгөрсөн зургаадугаар сард хотын замд гэнэт шар хайс барьсан. Гэтэл нөгөө хайс нь жаахан салхины ая даахгүй хийсэн унаж, цөөнгүй хүний машиныг “ямбийлгаж” багагүй хохирол учруулсан билээ. Энэ шар хайсыг “Даян байгаль” ХХК нийлүүлсэн гэдэг.

Энэ шар хайс БНХАУ-д нэг метр нь 88-210 юаниар зарагддаг. Гэтэл 160 мянган төгрөгөөр нийлүүлж, 4000 орчим  метр энэ хайсыг нийт 766.3 сая төгрөгөөр нийлүүлсэн нь тодорхой болсон. Суурилуулахад 38.5 сая төгрөг зарцуулж, нийт 804.8 сая төгрөгөөр тавигдсан хайс гэсэн үг. Гэтэл энэ их мөнгөөр босгосон хайс салхины ая даахгүй унаж  олон хүнийг хохироосон.

Иймээс “Даян байгаль” 700 саяын ханштай гэж нэрлэх болсон билээ. Авто замын голд байрлуулсан шар хайс салхины улмаас унаж, замын хөдөлгөөнд оролцож байсан зарим автомашин болон хүний эрүүл мэндэд хохирол учруулсан асуудалд холбогдох албан тушаалтнуудад хариуцлага тооцож, иргэдэд учирсан хохирлыг барагдуулахыг Хотын дарга С.Амарсайхан үүрэгдсэн ч мөн л таг чиг дарагдлаа.