ХХБ-ны теллер О.Бат-Оргил хулгайлсан 969 сая төгрөгийнхөө 114 саяыг нь тайчигч хүүхнүүдэд цацжээ

Тус банкны “Энхтайван” салбарын харилцагчийн үйлчилгээний ажилтан О.Бат-Оргил нь тэрбум гаруй төгрөг хулгайлаад хагас жилийн турш тэрбумтан шиг мөнгийг баруун солгойгүй цацаж маш бийлэгжүү загнажээ. Тэрээр үргэлжилсэн үйлдлээр 2023 оны 11-р сарын 15-ны өдрөөс 2024 оны 4-р сарын 30-ны өдрийг хүртэл хугацаанд нийт 53 удаагийн үргэлжилсэн үйлдлээр банкны харилцагч нар болох гадаад улсын нэр бүхий 14 иргэний хугацаагүй хадгаламж, харилцахын долларын 10, төгрөгийн зургаа нийт 16 данснаас 90,7 сая төгрөг, 36,6 мянган доллар буюу нийт 215,5 сая төгрөгийг бэлэн зарлага хэлбэрээр, 248,1 сая төгрөг, 149,8 мянган доллар буюу нийт 754,3 29,297 төгрөгийг дотоод шилжүүлэг хэлбэрээр хулгайлан авч ХХБ-нд 969,8 сая төгрөгийн хохирол учруулжээ. Хулгайлсан мөнгөнөөсөө 640 саяыг нь ээжийнхээ Голомт банкны данс руу шилжүүлж 648,9 саяыг нь өөрийнхөө Хаан банкны дансаар авчээ. Мөн өөрийн үеэл ах О.Чинзоригийн дансад 220,8 сая төгрөгийг шилжүүлж үүнээс 103,8 сая төгрөгийг нь өөрийн дансанд авсан байна. Харин үеэл ах нь үлдсэн 119 сая төгрөгийг нь өөрийн юм шиг зарцуулж 15,5 саяар нь өрөө төлж, 103 саяыг бэлнээр гаргаж авсан гэж тогтоогджээ. Энэ хэргийн хохирогчид нь Япон, Өмнөд Солонгосын иргэд байж таарчээ. Тус банк нь Токиод салбартай тул гадаад иргэд мөнгөө хадгалуулдаг байна. Хагас жил шахам үргэлжилсэн энэ хулгайг банкны дотоод аудитынхан удаан хугацаанд гүйлгээ хийгээгүй гадаад иргэдийн хадгаламж болон харилцах дансанд зайны аудит хийх явцдаа илрүүлжээ. Мөн ганц нэг гадаад харилцагч сэжиг бүхий гүйлгээний талаар гомдол гаргасан аж. Камерийн бичлэгээр тухайн харилцагч ирээгүй байхад теллер О.Бат-Оргил ганцаараа гүйлгээ хийсэн нь илэрчээ. Хулгайн гүйлгээ хийсэн тул ахлахаараа гүйлгээ хянуулалгүй бултчихдаг байжээ. Экс теллер мөрийтэй тоглоомд одтой нэгэн байжээ. Хулгайлсан мөнгөөрөө цахим мөрийтэй тоглоод 230 сая төгрөг хожсон гэнэ. Мөн мөрийтэй тоглоомноос гадна тайчигч хүүхнүүдийг мөнгөөр дарж алах шахжээ. Энэ нь нэгэн тайчигч хүүхэнд ухаангүй дурласанаас болсон аж.

“... Би О.Бат-Оргилыг танина. Анх “**” нэртэй бааранд ажилд ороод удаагүй байхад манайд үйлчлүүлэх гэж орж ирэхэд нь танилцаж байсан. Миний мэдэж байгаагаар 2023 оны 12-р сараас 2024 оны 4-р сарын сүүл хүртэл бараг өдөр болгон ирдэг байсан. Ирэх болгондоо VIP өрөө авч намайг хажуудаа суулгадаг, тэгээд үнэтэй архи, ундаа хоол захиалж өдөрт ойролцоогоор 3-4 сая төгрөгийн тооцоо хийдэг. Зөвхөн намайг хажуудаа суулгаж юм ярьж караоке дуулдаг, өөр охин дуудаж бүжиглүүлдэггүй. Надтай болзож гадуур уулзая гэж их гуйдаг ч би татгалзсан. Бүр надад хайртай гээд байсан. Гэхдээ би зөвхөн ажлаа л хийж байсан тул тэр нь надад хамаагүй. Тэр манай баараар үйлчлүүлээд төлбөрөө төлдөг. Би баарнаасаа цалингаа авдаг. Тэгээд л болоо. Бидний хооронд өр авлага, мөнгөний тооцоо байхгүй ...”

“...Би “***” клубт 2023 оны 1-р сараас 2024 оны 7-р сар хүртэл баармэн, заримдаа касс хийдэг байсан. Энэ хугацаанд миний мэдэхээр Оргил гэх залуу өдөр болгон орж ирж үйлчлүүлдэг. Ирэхдээ хааяа ганцаараа хааяа найзуудтайгаа орж ирдэг. Өдөр болгон орж ирдэг шалтгаан нь манай байгууллагын ажилтан буюу хагас нүцгэн бүжиглэдэг охидын нэгэнд сайн болсон гэсэн. Тэгээд тухайн сайн болсон гэх охины бүтэн өдрийх нь орлогыг 2-3 дахин нугалж өгөөд VIP өрөөнд авдаг байсан...”

“...Би “***” нэртэй бааранд касс хийдэг байсан. Энэ 32 удаагийн 114,4 сая төгрөгийн орлогыг санаж байна. Манайд Оргил гэх нэрээр үйлчлүүлдэг намхан шар залуу 2023 оны 11-р сараас 2024 оны 5-р сарын хооронд найзуудтайгаа эсвэл ганцаараа долоо хоногт 4-5 удаа орж ирэн VIP өрөөнд дуулах, үнэтэй архи уух, манайд ажилладаг охидуудыг бүжиглүүлэх зэрэг үйлчилгээ авдаг. Гарахдаа банкны карт байхгүй гээд касс хийж байгаа миний дансанд төлбөрөө шилжүүлдэг ...”

Тайчигч бүсгүйд дурлаж дурлалдаа сохорсон теллер хохирлоосоо нэг ч төгрөг төлөөгүй аж. Үеэл ах нь мөн адил гэнэ. Шүүх экс теллерийг 4,6 жилээр хорих ялаар шийтгэжээ. Харин үеэл ахад нь ял оноогоогүй байна.

Сэтгэгдэл

Анхаар! Уншигчдын бичсэн сэтгэгдэлд http://alim.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.