Сонгуулийн дараа төрийн албан хаагчдын “туршлага судлах”, бүх шатны ИТХ-ын төлөөлөгчдийн “чадавхижих” хэмээх хугацаа нь дуусашгүй, зардал нь дийлдэшгүй  “аян” эхэлдэг. Бүр сонгуульт хугацаа дуусах хүртэл үргэлжилж хэдэн тэрбумаар тооцогдох мөнгө үрэгддэг. Тэгвэл хугацааны тал нь өнгөрөөд байхад Баянгол дүүргийн ИТХ-ын төлөөлөгчид “чадавхиж” дуусаагүй л байна. Лавтайяа 2023 он өнгөртөл үргэлжилэх агаад төсвийн мөнгөөр олж авсан “чадавхиа” яг гаргах гэтэл сонгуулийн хугацаа дуусаж таарах магадлалтай болсон нь “монгол хүн 60 хүрч ухаан суугаад 61-тэйдээ нүд аньдаг” гэгчийн үлгэртэй адил. Хугацаа бачимаас гадна мөнгө нь талийж өгчээ. Зуны хоёрхон л сард багаар бодоход 66 сая төгрөгийг “чадавхижуулах” гэгч мангас залгиж орхижээ. Дүүргийн ИТХ-ын дарга нар 5-р сард гэхэд л “төлөөлөгчдийг чадавхижуулах арга хэмжээний зардал” гаргах найман тушаал буулгажээ. Нэг тушаал нь доод тал нь гурав дээд тал нь 12 сая төгрөгний хэмжээтэй. 6-р сард долоон тушаал гаргаснаас зөвхөн хоёрых нь мэдээлэл орсон агаад нэг нь гурав, нөгөө нь 15 сая төгрөгийнх байна. Үлдсэн тавыг нь тус бүр нь гурван сая гэж тооцвол 6-р сард 30 сая төгрөг гаргасан бололтой. Төлөөлөгчдийн “чадавхижиж” буй сургалтыг сохнирхоход англи хэл, хувь хүний хөгжил, гэр бүлийн боловсрол, бизнесийн гэх мэт байх юм. Үүнээс харахад ядахдаа англи хэл ч мэдэхгүй, ерөөсөө чадавхижаагүй хүмүүс  төлөөлөгч болдог нь Баянголын нэг гачлан аж. Гэлээ ч яах ч аргагүй тул үлдсэн нэг жилд төлөөлөгчидийг яаралтай бүрэн “чадавхижуулах”-гүй бол татвар төлөгчдийн мөнгөөр олж авсан “чадавхиа” татвар төлөгчдийн төлөө гаргахад ганцхан жил л үлдээд байна шүү ...